الشاعر :ونسيبته
شن درتلك يا نسيبتي كرهتيني * فى الراس حطيتيني * بعد المحبة ليش عاديتيني
شن درتلك من سيه * وشن درتلك من عيب ردي عليا
متغيره لقيتك ومش عاديه * علقتي طواري وين ماشفتيني
انا جيت نبي انردها البنيه * وقبل مانتكلم طول سكتيني
نسيبته :شعبى الشاعر ونسيبته
اسمع كلامي فسرا مدلولا * انا رضيت بيها نسبتك مهبولا
وحرام لشكلك بنتنا نعطولا * بنتي معاك فى حال مايرضيني
انا رميتها فى غوط خالي سبولا * ومالقيت مره حالها يزهيني
الشاعر :شعبى الشاعر ونسيبته
عليا بالهجوم بديتي * ومسرع معايا فى الكلام حميتي
مانيش غالط كيف ماضنيتي * حكمتي عليا غلط وظلمتيني
غير ليش منها نسبتي مليتي * انتي عارفه بالحال وقبلتيني
نسيبته :شعبى الشاعر ونسيبته
قبلت غصبن عني * الله يسامح الشايب اللى خبلني
مسكر دماغك ماتبي تفهمني * انقول برا ايسار تمشي ايميني
بنتي معاك فى حال ماطمني * وديما عليها خاطرى مشقيني
الشاعر :شعبى الشاعر ونسيبته
بنتك معايا فى هنا وسعاده * وتضحك وتلعب دوم كيف العاده
واللى نقصها انوفره فميعاده * وشنهي نقصها وضحي وريني
والخير ديما ان شاء الله فـ زياده * مادام نخدم بـعرق جبيني
نسيبته :شعبى الشاعر ونسيبته
بنتي معاك سنيين شن درتلها * وقداش مره اثاث غيرتلها
رابش عقاب كريهبا شريتلها * الدخان من الماطور بيعميني
انا عارفه للفقر بتوصلها * يصعب عليا حالها يبكيني
الشاعر :شعبى الشاعر ونسيبته
بنتك معايا مااختصت حاجه * وماهيش زيك عل النكد لواجه
ولا ناقصه لاغاز لاثلاجة * وقداش من دولاب فايضه ادراجه
ونوضي انشديها كان كذبتيني
نسيبته :شعبى الشاعر ونسيبته
عيشت الله العازا * شوف اختها اللى عايشه ممتازه
حتا الهاتف غيرت جيهازا * ولت على النقال بتحاكيني
اشبح عديلك خاشها درازا * رصيد بالدولار واسترليني
ماهوش زيك حالته محتاجه * وديما جيوبه خاليه ملاقيني
الشاعر :شعبى الشاعر ونسيبته
تو راك معاي عفنتيها * وماعاد حتى دوتك نبيها
وكان الوليه معاى بترديها * نبي جوابك مختصر تعطيني
وكل وقت عليا حملتك ترميها * وبكل كلمة قاصده اتهينيني
نسيبته :شعبى الشاعر ونسيبته
يالوكان توصل للقمر مشوارك * محال بنتي انردها لدارك
تنسم ادردح والتهي بصغارك * ماعاد وجهك شبحته اتوريني
مليت منها نشفتك وقحارك * بنغلط معاك انكان مش خاطيني
الشاعر :شعبى الشاعر ونسيبته
انتي غالطه والغلط فايت حده * مادامك لبيتي نويتي هده
انتي حرام حتى فيك كلمة جده * مادام عن الصلح صديتيني
الموضوع للقانون نبي انرده * والمحكمة بيناتنا اتصافيني
نسيبته :شعبى الشاعر ونسيبته
خوفتني ضنيتك * وماني فلانه انكان ماقديتك
تندم عليها عملتك خليتك * مادام للقانون بتمشيني
وبالك تحساب انخاف من شخصيتك * عاند معاي انكان متحديني
الشاعر :شعبى الشاعر ونسيبته
انا عارفك منقوبه * قليلة الخير وشيرتك مذهوبه
والشر ديمه تبحثي على دروبه * ولايوم من الايام ريحتيني
من يوم ريتك عيشتي منكوبه * وياريت ماعرفتك ولا عرفتيني
نسيبته شعبى الشاعر ونسيبته
مسؤل عنها كلمتك هاذيه * انا الاوله بندير فيك قضيه
نقوللهم هالشخص غالط فيا * في وسط بيتى جاى متعديني
وذنبي عطيته بنت ماهي اشويه * حتا لون عيونها زرقيني
بيضه طويله كيف الالمانيه * وشوفو عليها كيف بيجازيني
الشاعر :شعبى الشاعر ونسيبته
انا عارفك مدعي ه * وفى الخبث ليك افكار شيطانيه
وفى الكذب ديما فالحه فنيه * نبي نفضحك للناس خليتيني
قلتي عطيتك كيف الالمانيه * وانتي بلوحه معوجه حذفتيني
ورضيت بقسمة الله عليا * وناصيب بالهول علي داعيني
نسيبته :شعبى الشاعر ونسيبته
شنهي شكلك عاجبا فى روحه * مادام بنتى وصفتها بلوحه
فى الفقر عايش ماك فى بحبوحه * ووجهك يبشر بهموم سنيني
انا قريب نشبح جبهتك مفتوحه * لوكان ماتمشيش وتباريني
الشاعر :شعبى الشاعر ونسيبته
انا قبل مانمشي انقولك مانخبي * ياغالطه بيني وبينك ربي
مادام عكسي فى الطريق ادبي * وما دام هكي ناويه اضريني
الله يجعلك بـ طانطه تنقبي * ولا بجلطه فيك اترزيني
وحرام حتا جنازتك مانصبي * بديتي نسيبت نحس ماتهميني