خيرهم معانا إش درنالهم يا حبيبتي؟

الأربعاء يناير 18, 2012 6:02 pm

خيرهم معانا إش درنالهم يا حبيبتي؟

--------------------------------------------------------------------------------

من قفشات الرحال الهزل الممزوج بالجد ..نناقش من خلاله ما يدور في الشارع الليبي باللهجة الدارجة..

الدوة كاثرة و الفعل مهناش
حويج قالولي اليوم قبضت..
كلامك صح يا حاج..
بس ما قبضت لين قريب قبضوا روحي...
يا كااااه مش السيولة متوفرة..؟
متوفرة بس في جيوب الجماعة ..
تي المهم خديت معاشك..
ما علينا إش الأخبار ..ما عندكش شي جديد..
الكلام عندك ياحويج..
ياريتني الحويج كان هذا ما تلقاني بجنبك..
قصدك الحويج الحويج بتاع المالية في عهد عمورة..؟
إيه صمت الفلوس كيفه كيف الجماعة و شيط و لا حد مدوره..
لا لا قالوا النايب العام شادها في جرتهم..
خرف يابا خرف تي النايب العام غير يلهى في الجدد ..
تي توا يجيبهم خيرك مستعجل...
إيه تو يجيبهم......بالله لما يطلع علينا مسهول من الإنتقالي و يقول اليوم أصدرنا مذكرات قبض للناس إللي هاربة البرا و نتابعوا فيهم ...و بنجيبوهم..و مش رح إضيع فلوسكم يا ليبيين...و غير أصبروا...و كل من شارك في سرقتكم ..و خنب فلوسكم...و قتل صغاركم...و أعتدى على شرف نسونكم..كلهم بنجيبوهم بيش يتحاكموا في ليبيا...
و بعده يطلع كله كلام في كلام و دوة تلفزيونات و بس إش تقول ...؟
تي غير كيف صاااار ياحاج؟
مسخفيني ولادنا يا راجل ...ضيعوا حياتهم في سبيل ليبيا بيش تبقى حرة و نستمتع نا و أنت و هوا بالحرية..و بعدها إخوانا الوزراء و الوكلاء و النواب و حتى الروووس الجدد يقعدوا يكذبوا و يحطوا ..كيف ما نزعلش نا إش تحسابني حيط..و إلا زينقو..و إلا بالك تحسابني باكستاني..
تيم اهو كل شي يجي بالهدو..
أول أمس في أيام ربي الشباب شدوا واحد من الكلاب ..التهامي بن خالد الورفلي في مصر و لما سلموه للشرطة ..عارف إش صار..؟
شنو صار ؟
الشرطة طلقاته عارف لش؟
لا و الله ما عارف شي تي هو منو بن خالد هذا ؟
التهامي هذا تاريخه أسود كيف لون رئيس تشاد أكحل لين خلاص ..هذا الكلب هو اللي قتل صغارنا من زمان موش توا وبس..و الشرطة المصرية فرجت عليه لأن سي الباشا وزير العدل و النايب العام مش صادرين فيه مذكرة إعتقال..عرفت ليش ؟
صار هكي و ليش يقولوا درنا و درنا و بعثنا مذكرات إعتقال و بنشدوهم و بنفعلولهم و و و و ..؟
دوة في دوة و الفعل مهناش..
يا راجل فديت ..شنو نطلع في الشارع نعيط...
خخخخخ قريب نقولك كلمة إضحك...
قول : خيرهم معانا إش درنالهم يا حبيبتي؟
ههههه و الله شي يضحك واجد..
تي باهي باهي المهم فلوسك في جيبك و المعاش قاعد ينزل...
باهي والله كان حتى المعاش وقفوه...راحت ليل..
علي ذكر الفلوس...وكيل وزارة الخارجية قال الفلوس وصلت للمصرف حوالي 20 مليار..و بعدها طلع عبدالكبير بتاع البنك المركزي و قال ما وصلنا شي...و بعدها قالو...و إلا خليني ساكت ..ما نبي نقرم حد..
تي شنو قلنا مش القرمة حلال و الشيخ قال عادي هاذي مش نميمة ..أخطى جليل بس... و أهلب عليهم كلهم..
زعمه ما فيش حد يتصنت؟
لا... بروحنا حتى المؤيد ما قابلش اليوم ..
الصراحة قريب نكفر يا حاج ..نحنا نحكوا في وادي و حكومة الكيب في وادي..
تي غير شنو فيه؟
العبيد الأفارقة دعموا معمر بكل ما عندهم و اليوم الحكومة تبيهم يشاركوا في التنمية ..تي هاذم غير يهتموا بناسهم و بعدين ساهل ..مصر قال الكيب وقعنا معاها عدة إتفاقيات ..و حنا مش عارفين شنو هالإتفاقيات..تركيا بيخلوها ترفع 12000 من الثوار قالت بدربهم –بدربهم علي شنو؟ مش معروف..أنا خايف والله..
من شنو خايف ياحاج؟
خايف لا يقولولنا إش رايكم تمشوا تعيشوا مع العبيد في أفريقيا ...
تي لا لا غير أنت موسوس..
بالله قبل ما ننسى إش صار في الكلام اللي كل مرة يقولوا فيه و بعدها يسكتوا؟
زي شنو يا حاج ؟
شد عندك:
مكان مقبرة شهداء بوسليم – المصالحة بين غريان و الآصابعة – مشكلة تاورغاء – تسليم سيف للجنائية – تقرير مصروفات المكتب التنفيذي – موضوع عبدالفتاح –دمج الثوار – موضوع عبدالله السنوسي – إيااااه عيت و نا نعد..
توا تفرج يا حاج و ليبيا تولي كيف الفرح و السعد...
علي ذكر السعد ..طيحونا سعدنا طيح سعدهم حكومة فاشلة التريس اللي مع عمورة عايشين في كل مكان ..نهبوا فلوسنا و ياما منهم مداير لروحه مشروع يسترزق منه و أحنا قاعدين نقرموا في عباد ربي...
قصدك الحكومة الجديدة؟
هي الحكومة ما تغيرتش غير الوجوه هي اللي تغيرت...
لا لا هكي هلبة يا حاج.

الأربعاء يناير 18, 2012 7:17 pm

[ندعوك للتسجيل في المنتدى أو التعريف بنفسك لمعاينة هذه الصورة]

الأربعاء يناير 18, 2012 11:49 pm

[ندعوك للتسجيل في المنتدى أو التعريف بنفسك لمعاينة هذه الصورة]

الإثنين يناير 23, 2012 1:36 pm

ما تعليقاتكم على هذا الكلام ....
أين حواراتكم على هذا الكلام ....
أين تهدريزكم على هذا الكلام ....
أين فشة خلقكم على هذا الكلام ...

أليس هذا قسم الحوار والنقاش .؟
أم قسم الردود المنسخة .؟

فإليكم ردي أنا على هذا الكلام ...

بالفعل في ناس كانت في اللجان الثورية وهربت لمصر وماجراء فيلات وليس واحدة فقط للسكن وحياشهم اهني قاعدين فيهم اماليهم لما تهدا الامور وينسوهم يرجعوا ايعيشوا بينا ولا من شاف ولا من درى

واحنا محلك سر غير قولوا انشاء الله دماء شهداءنا ماتمشيش هباء

الإثنين يناير 23, 2012 5:36 pm

فعلاً عندك أكبر حق باننا قد خالفنا هذا القسم وباقي الاقسم
لعدم التعليق المناسب لكل موضوع
وهذا يعتبر وجهة نظر لكل عضو يقراء المواضيع
والتعليق المناسب به
نحن فعلاً نأسف لكي ولكل الاعضاء وسوف نتدارك
ذلك
اما بخصوص هذا الموضوع المهم بنظرى
فعلاً هناك ناس هربت خارج ليبيا لكي لا يطالها العقاب
بما فعلوه بأفراد الثورا الليبين الحقيقين اللذين قبعوا
في سجون الطاغيه وكانوا هاذم الناس اللذين هربوا خارج
ليبيا مسئولين مسئوليه مباشرة لازهاق ارواح الشهداء
ابان فترة الثورة المجيدة
وسوف يلحقهم العقاب أجلاً أم عاجلاً وبعد ما يستذب الامن
أن شاء الله سيتم تفعيل المحاكم ومكاتب وكلاء النيابه لملاحقة
كل من فعل فعل يعد جريمة

تسلمي أختي علي هذا التنبيه أولاً
وبارك الله فيك
وما حرمنا من طلتك البهيه
وجزاك الله كل خير
تحياتي

الثلاثاء يناير 24, 2012 12:39 pm

مشكور على تقبلك لوجه نظري الذى مستندة من قانون المنتدى ..

وانشاء الله يتعاقبوا لان بصراحة انا قلبي دم عليهم وعلى المتسلقين والمتفنينين في التسلق ويلي انشوف فيهم يومين وكانهم ابناء الجبهات ياريت ايكون ليهم عقاب يشفي غليلي

الجمعة مارس 02, 2012 9:27 pm

الكلام اصبح كثير المفروض نستفيدوا منه في قصص وحكايات رائعة ...واذا استمر الموضوع على هذا الحال المجلدات سوف يتجاوز الحد المعقول

الإثنين مارس 05, 2012 11:22 am

شكرا على مساهمتك في الرد ولكن اختي tofrelouir ها المواضيع مش لازم الواحد يسكت عليهم حتى اذا كان لا نملك القدرة في تغير الواقع ولكن يجب الا نسكت حتى ولو امتلأت جميع المجلدات .
السكوت عن الحق شيطان اخرس

الإثنين مارس 05, 2012 7:08 pm

لااضن ان الحديث الذي يدفع الحميع الى معرفة الحقائق خطأ فالجميع يفهم المواضيع عند التحدث فيها ويدلك نحصل على عدد اكبر من الناس الذين يفهمون ما نتحدث عنه في الحقيقة اشعر اني اراك وانت تنفعلين وهذا يجعل من حدة الصوت الذي يربطني بصورتك التى اتخيلها يضعني في موقف من يحاول تهدئة الموضوع فالامثال في مثل هذه المواضيع لاتفيد بقدر ما يفيد توجيه انفعالنا الى الافضل وترك ما يفيد من هذه التجربة وهي وان كانت تدفعنا الى فترات نفسيه عصيبة ...اتجاه الناس الا انها تعتبر فترة مهمة لتحديث اتجاه تحركات الناس في بلادنا وخاصة اننا نتأثر بدول الجوار والدول التى تربطنا بها علاقات اخوة وصداقة بشدة لذلك يجب علينا الا ننسى انفسنا واهدافنا وان نضع نصب اعيننا الطريق الذي نبني به بلادنا وليس تقليد الاخرين

خيرهم معانا إش درنالهم يا حبيبتي؟

خيرهم معانا إش درنالهم يا حبيبتي؟

رد: خيرهم معانا إش درنالهم يا حبيبتي؟

رد: خيرهم معانا إش درنالهم يا حبيبتي؟

رد: خيرهم معانا إش درنالهم يا حبيبتي؟

رد: خيرهم معانا إش درنالهم يا حبيبتي؟

رد: خيرهم معانا إش درنالهم يا حبيبتي؟

رد: خيرهم معانا إش درنالهم يا حبيبتي؟

رد: خيرهم معانا إش درنالهم يا حبيبتي؟

رد: خيرهم معانا إش درنالهم يا حبيبتي؟